Es isch meischtens so gsy, dass eine vo üsne Söhn e Kolleg mit Hei gno het wo grad e schwierigi Zyt düregmacht het. Si hei, Eine nach em Andere, e paar Mönet oder o länger bi üs gwohnt u hei a üsem Familieläbe teilgnoh.
Bym einte, het der Kurt Mal es Telefon vom ne Polizischt übercho. Dä het ihn gfragt, öb är wüssi wär mit sym Outo umefahri? Er sygi zum Glück vo dere Person, denn nid am schaffe gsy. Vor Outobahnyfahrt Rubige bis uf Bärn yne, syg är ihm nachegfahre u dä heigi sage und schreibe Acht Mal s'Gsetz broche: paar Mal z'schnäll gfahre, zwöi Mal bi Rot düre, falsch dür ne Eibahn, dört aaghalte wo me nid dörfti u schlussändlech bym ne Parkverbot s'Outo lah stah...Er söll däm sys Outo nümm gäh zum bruuche...
Bym ne andere wo yzogen isch, het der vorhärig Vermieter mir i d'Feri aaglütte u gfutteret: i müessi luege, dass är syni Wohnig lähri u de richtig putzi. Won är no gseit het, i nähmi dä nume wäg em Gäld bi üs uf bin ig richtig hässig worde u ha ihm ufghänkt. Derbi hei mir vo ihm kes Füfi fürs Wohne übercho...
Mit de meischte vo dene Manne hei mir geng no guete Kontakt.