Am Morge früeh han ig z'ersch mys Kaffi bruucht. Am haubi Nüni sy d'Cousine u ihre Maa cho zmörgele. Der Kurt isch der ganz Tag mit ihne ungerwägs gsy. I bi zu Spörri's in Grosshöchstette go Outo tuusche. I ha ihres dörfe bruuche u si hei der Copen gno. I bi go d'Mamie hole. Der David het aaglütte u gfragt, öb ig d'Jael chönni mitnäh. Si wöll ume zu mir. I bi z'ersch go der Pesche hole. Für uf Riedtwil han ig eh müesse über Hasle fahre, so han ig d'Jael dört ufglade.
I Spörri's Huus, respektiv i ihrem wunderdchöne Garte hei sech, wi scho am 1. Ougust, Lüt vo ihrem Fründeskreis versammlet. Der Jonathan u d'Eli hei zum Zmittag u Zvieri yglade gha, zur d'Presentation vo sym Buech: "der MissionNarr". I der letschte drüü Jahr, het är us sym bewegte Läbe gschrybe. Es isch trotz Räge, e gmüetleche Namittag gsy. Der Mäni het d'Mamie u d'Jael Hei gstellt u ig bi mit em Pesche im Copen, no uf Wynau go öppis für e Kurt go erledige . Bis ig ihn im Bärau abglade ha u Hei gfahre bi, isch guet haubi Nüni gsy. I bi so erschöpft gsy, dass ig gly Mau is Bett bi.