D'Jael u der Aiden hei bi üs gschlafe. Si sy gäge di Nüne is Bett u hei no glaveret. Wo der Poppeli isch no Mau go guet Nacht säge, är het e haub Stund vorhär es Gschichtli verzellt u het mit ihne bättet u ig o, het d'Jael doch e chly Längizytti gha. Der Poppeli het gfragt, öb är de bi ihne söu liege, hei si ja gseit u sy beidi gly yygschlafe.
Hüt am Morge het der h. glütte u niemer het's ghört. Gäge haubi Achti isch der M@i cho schaffe u het üs gweckt. Es syge Gipfeli u Küngu da. Der H. tuet aube üsi Stappler flicke u lieferet aube o no grad feins Küngu Fleisch. Är het Hüt no Gipfeli u wunderschöni Dahlie us sym Garte bracht. D'Jael u der Aiden sy sofort uf, sobaud si üs ghört hei. Si hei nach em Zmorge wunderschön zäme glegölet.
Der Kurt het kurzfrischtig uf di Eis, e Termin bym Zahnarzt übercho udrum het er mit em M@i früeh Zmittag gkochet. Der David isch du o da gsy zum Ässe u het nächär d'Jel grad mitgnoh. I ha du o grad der Aiden Hei gstellt. Won ig ume Daheime bi gsy, bin ig grad knüttu gsy...Chuum bin ig abgläge, het der M@i aaglütte, öb ig mit em Outo is Bigenthal chönni cho u derfür der Lieferwage ume Hei, zur Rampi bringi. I bi no mit em P. go ne Stepper hole u ha nächär der Lieferwage byr Rampi parkiert. I bi ume go liege u plötzlech sy der S. u d'A. zum ne Kaffi cho. Der M@i hets mit übercho u isch o grad cho. Mir hei no anders drunke u ig bi ume go liege. Der Kurt isch nach em Zahnarzt vo Thun hurti uf
Wilderswil zueche u het ungerwägs no öppis poschtet für Hinecht. Da chunnt syni Cousine mit ihrem Maa u em Wohnwage uf Bsuech. Er isch mit em Copen ungerwägs gsy u het mi no i d'Mänziwilegg zum ne feine Roastbeef mit Pommes u verschiedene Salät usgfüehrt. Vory het grad der M@i aaglütte, der Proace sygi am rouchne, öb öpper vo üs chönni go d'Sabrina hole. Si wagi nümme mit däm umez'fahre. Der Kurt isch du mit em Auris gfahre u laht äuä der Proace grad la stah...