Am haubi Drüü bin ig bym Drüütanne Huus gsy. Es isch e Pflegendi mit mir go der Peter bym Schaffe abhole u si het üs i d'Arztpraxis begleitet. Dört hei mir uf syni Bezugsperson gwartet u si nächär zäme vor Ärztin abgholt worde. Si het mi aagluegt u gseit."mir kennen üs doch!" Ja s'letschte Mal won ig se gseh ha, isch es im Kinderspital gsy. I weiss nümm mit welem Grosskind ig denn dört bi gsy. Es isch d'Tochter vo Bekannte vo üs. Si isch als Assistenzärztin für zwöi Mönet im Bärau i dere Praxis wo vom Spital Langnau uus betriebe wird. Der Peter isch guet zwäg, das freut mi! Er het scho Gester mit der Aktivierig chönne go bade. Er wird aagmäudet für i d'Physio, wäg syne Bei.
Daheime hei der Stephan u syni Giele u d'Jael uf mi gwartet. Der Aiden wott o grad da schlafe wi d'Jael. Si hei vory erklärt, dass si wölle hürate wenn si de gross syge. D'Jael het gmeint, si wöu de drüü Kinder. Der Aiden het gmeint, är wett de lieber nume zwöi. Süsch heig är's o so aasträngend wi's s'Mami heigi!