Ja, d'Griechenland Ferie hei aube scho uf der Fähre aagfange. Vo Ancona uf Patras isch me ja fasch 24 Stund druf u da isch aube unger de Junge scho d'Post ab. Di meiste hei nid mängi Stund gschlafe. Da isch Karte gspielt, glaveret oder gmusiget u Tanzet worde. Es het Familiene gha wo jedes Jahr, anderi all zwöi Jahr u no anderi sporadisch u einigi nöi i di Familieferien am Meer mit sy.
Uf der Wanderig zum Wyguet wo's jedes Jahr Wy u Olivenöl zum degustiere het ggäh, het der Kurt däm Maa gseit wo mit ihm häregloffen isch: " Du redsch genau glych wi ne Fründ vo mir. Wi heissisch eigetlech zum Nachname? Da het er gfragt wi dä Fründ heissi. Wo der Kurt der Name gseit het, het er trocke gseit:
"das isch dänk mi Zwillingsbrüetsch" Mir hei so viel glachet zäme. Syni Frou isch denn scho rächt schlächt dranne gsy. Si het Kräbs gha u s'isch ihri letschti Reis gsy. Eis Jahr druf isch är doch mit de Giele mit, syni Frou isch ungerdessi gstorbe gsy. Eine vo ihrne Söhn isch geng zu üs a Tisch u het's gnosse mit üs zäme z'sy. Mir hei ihne der Vorschlag gmacht, dass är zu üs chönni cho wohne, we's Daheime nümme gieng. Es paar Wuche später isch er bi üs yzoge. Er isch es guets Jahr bi üs gwohnt u isch nächär i ne therapeutischi Wohngmeinschaft gange.