Hüt am Morge han ig dörfe uf livenet.ch/pause der "Pausenbrot" Input halte. I bi nächär is Timeout. Dört han ig grad mit zwöine Froue gredt. Di Einti het mi Livenet Talk gluegt gha u di zwöiti het mi gfragt wi's mir göng. Si heigi mi so lang nümme gseh. Si het no Mal gluegt u het gmeint; "hesch ume Chemo gha?" I ha ihre du verzellt wi's mir geit u, dass i Dank mym Gloube kei Angst vor em Tod heigi wüu ig a nes ewigs Läbe nach em Tod gloubi wo's keni Schmärze u ke Kräbs meh heigi. I ha's ume gnosse, im Solebad u im Dampfbad. I bi wieder Mal go ychoufe u bi nächär grad Hei. D'R. isch mi cho bsueche, zum ne Käffeli mit eim vo ihrne Tageskinder. Am Drü isch d'R. cho u het mir e Fuesspfleg gmacht. Der David isch hurti verby cho u d'Jael isch grad da blybe. D'R. isch mit ihrem Schützling ume Hei. D'Flavia het nach mir o dörfe härehaa. Si isch mit der ganze Familie cho. Nachdäm mir schöni Füess hei gha isch d'R. ume Hei. Thürs sy zum Znacht da blybe u der David het d'Jael nächär ume abgholt. Der M@i u d'Sabrina sy no hurti am R. cho tschüss säge wo Morn ume Hei geit. Jetz isch es ume ruhig ar Syrengasse.