Ja, hüt am Abe göh mir mit ihre go fyyre. I ha verzellt gha, wi üs der M@i in Griecheland mit dere Familie zämebracht het. Mir hei üs also immer wieder troffe, in Griecheland u o süsch. Eines Tages het mi d'C. gfragt, öb ig Fröid hätti mit ihre und em ne Team im Tessin Froueverwöhntäg hälfe z'leite. Si bruuchi öpper wo s'Musikalische übernähm. I bi sofort derby gsy. So isch es cho, dass mir acht Jahr lang im Juni für ei Wuche uf Locarno i d'Casa Lumino sy. Es isch jedes Mal spannend gsy, was für Froue mir zwöi Mal drüü Täg hei chönne verwöhne. Mir sy albe o sälber verwöhnt worde. D'C. het am Morge, bym Zmorge s'Wort zum neue Tag bracht. Nächär isch me gly Mal im Plenum zum ne spannende Gottesdienst mit Lieder, Aaspiel und em ne Input zum ne Frouespezifische Thema zämecho. Es isch immer am Namittag, es cools Programm gsy. D'Froue hei chönne, wenn si hei wölle, a verschiedene Workshops teilnäh. I ha albe es Lobprys Seminar ggäh. Eis Jahr hei mir chönne sälber Süesswasser Perlekettine mache. Es anders Jahr hei mir süsch Chräueli Schmuck gmacht. Es isch gmale, gschminkt, am eigete Stil aapasst aagleit worde u vieles meh. Einisch sy mir i zwöi Gruppe go d'Livia Bruscetti bsueche. I ha albe gstuunet ab der Kreativität vom Team. Leider het's für d'C. u für mi es abrupts Ändi gno.