Mir hei Bsuech gha vo Spörris us Schlosswil. Der Matthias het mit de Cousins hurti mit de Velos zu ihne wölle fahre für Pingpong Schläger z'hole. Är het no gseit: "mir lege no üsi Helme aa". Si sy nume bis i Kreisel cho...Vo üs us muesch für i die Richtig oben abe übere Kreisel a Bahnhof. Es isch a däm Samstig es alts Froueli s'Rohr unger ufe cho. Das heisst, d'Giele sy im Kreisel gsy u si isch vo unger dry cho. Si isch überzügt gsy Rechtsvortritt z'ha u het der M@i grad übere Huufe gfahre. E Muetter vom ne Schuelkolleg vom Stephan wo näbedraa gwohnt het, het mir aaglütte der Krankewage chömm de grad. Mi Suhn liegi zmitts im Kreisel am Bode. I bi so schnäll wi möglech häre. Das alte Froueli het der Polizist wölle belehre, si syg doch im Rächt u vo Rechts cho...Der Beamte het ihre erklärt, dass si o wenn si im Rächt wär, nid eifach es Kind dörf aafahre. Am Buuch het's es Zeiche gha vo sym Länker u am M@i sy Helm isch abenang gsy. I ha mit dörfe, mit Blauliecht is Kinderspital uf Bärn. Si hei der Buuch ultraschallet u der Kopf gröngtgget. Gägen Abe hei mir ume Hei dörfe.
I weiss nümm wi lang später het der M@i so fescht Buuchweh gha, dass mir zum Dokter sy. Er het wölle sicher sy, dass nüt vom Unfall här zrüggblybe syg u het üs im Kinderspital aagmäldet. Dört hei si gmerkt, dass der Blinddarm entzündet syg. I bi grad mit em M@i dört blybe. Är isch am nächschte Morge grad als Erschte operiert worde. Nach zwöi wytere Nächt dörte, hei mir du Hei dörfe.