Mir hei grad i d'Ferie wölle wo es Telefon cho isch vom ne Vater vom ne Modi us der Jungsch vo üsne Junge. Es göngi nüm guet Daheime u si wölle nid d'KESB yschalte. Öb ihri Tochter für nes Zyttli zu üs dörf cho wohne? Mir hei das mit üsne Junge aagluegt u si sy yverstande gsy. Nach de Ferie isch du di jungi Frou bi üs yzoge. Mir hei zäme e Vertrag ungerschybe wo mir Abmachige druf hei gha. Si het drüü Mal über d'Gränze dörfe u de müess si gah. Nach ere gwüsse Zyt het si sich i üsem riiisige Keller es Zimmer ygrichtet. Üse Keller isch über de Bürorüm u isch gheizt. A de Vorhäng wo si als Tüür bruucht het, isch dä Zettu ghänget. Si het würklech e gstaltigs Begabig!
Einisch het si a ne Party wölle. Da si no nid 16 isch gsy, hei mir ihre erloubt mit em letschte Zug Hei z'cho. Si het am Elfi no Mal aaglütte, d'Party göng ersch grad los...Öb si mit em Moonliner Hei dörf...I ha Nei gseit. Si isch du mit em erschte Zug Hei cho. Der Kurt het ihres Abszänseheft aagluegt u no so dänkt, "das ungerschrieben ig nid!" Am nächste Tag het si für e kurt 16 Mal ungerschybe gha. Wo si du nach sächs Mönet het müesse gah, hei mir beidi ghüület. I wett se gärn ume eis gseh! Es het doch es halbs Jahr guet klappet...Mir hei viel glachet i dere Zyt.