I ha hüt am Morge der Copen gsattlet u bi ume is Timeout go bade. I ha e halb Stund badet, bi no i d'Biosauna u i Dampf u ha mir e 40 minütigi Ölmassage gönnt. Das het so guet tah!
Zum Zmittag isch der David o cho hälfe Rüebli Rapse. I ha für ihn, am Kurt u mir Grüene, äbe Rüebli, Bohne (der Kurt het se am Morge vor em Schaffe hurti grüschtet gha u zum blanchiere i Steamer tah) e Räschte Tzaziki u Maissalat gmacht. Nach em Zmittag bin ig go d'Mamie hole u mi si Richtig Oberland. In Steffisburg hei mir ir GFC Buechhandlig Litauischi Litteratur für e R. ygkouft. I ha no süsch Büecher poschtet. Mir si nächär is Parkhotel uf Gunten. S'Mamie isch glücklech gsy, dört es paar Lüt kennt z'ha. Mir hei es Dessert ggässe u si nächär ume gäge Hei zue. Thürs u Mattis si mit em ne feine Znacht zu üs cho. Di Einte hei badet u der Poppeli het nächär no mit em Aiden es Füür gmacht. I ha nümm möge hocke u bi am 20.30 Uhr ufe. I schrybe ja liegend, i mym Spitalbett...