Da mir nume no zwöi sy, han ig nume zwöi Trummle Wösch gha...Am Mittag si mir Füfi gsy. D'R. het mir no feine, scho grüschtete Salat us ihrem Garte bracht. I ha Dodo gmacht (Kochbanane u Zibele gsalze u im Palmöl brätlet) u am M@i sine Ragôut mit Gschnätzeltem gstreckt u no ne Stund gkochet. Derzue han ig Tessiner Polenta gmacht. Zum Dessert han ig e Fruchtsalat gmacht(Mango, Bire, Aprikose u früsche Zitronesaft) derzue für die wo hei wölle, Griechisches Joghurt mit ygweichte u verchlynerti Dattle u Fige u Nidle.
Am Drü bin ig in Burgdorf bir C. gsy. Si het mir nid so Muet gmacht wäg myne Füess mit ihrer Sensibilitätsstörig. D'Chemo heigi haut d'Närve kaput gmacht. I hoffe glych, dass es wieder guet chunnt!
I ha uf Schwarzenburg zum früechere Husarzt vom Pesche müesse go syni Ungerlage hole u ungerschrybe, dass ig's gholt ha...Der Kurt isch mitcho u mir si mit em Copen über Belp häre u bym Zrüggcho über Ryffematt u hei uf em Gurnigel bi re härzige Bäsebeiz es Bier, Chäs, Wurst u Hobelfleischplättli gno. Mir si ersch vory Hei cho.