S'Grosi u beidi Stöckli Kids si denn im Herbst mit üs uf Sardinie i d'Nächi vo Olbia i d'Ferie mitcho. Bim Packe han ig vor allem für alli Andere gluegt. I ha für mi Medis paratgmacht u Daheime vergässe. Won ig's gmerkt ha, hei mir sofort mit der Schwyz Verbindig ufgno. Es isch no so gsy, dass mir vernoh hei, dass öpper us üsere Region uf di zwöiti Feriewuche uf Sardinie reisi. I ha gmäudet, im Badzimmer obe syge violetti Tablette u vo dene bruuchi ig es Doze. Es si mir du Tablette i re violette Schachtle gschickt worde. I ha aagnoh gha, dass es klappi u drum han ig alli gschlückt gha. Won ig gmerkt ha, dass ig statt Morphin Mageschoner übercho ha, isch der Kurt sofort mit mir is Spital. Dört het's schlimmer usgseh als in Afrika. Uf de Schränk obe, hei si di alte Krankegschichte mit Verbandmaterial umliiret versorget gha. Überall si Kabel gfährlech abeglampet. Si hei mir o ke Morphin chönne gäh. I ha scho richtigi Entzugserschynige gha...Wo mir wieder si go Morphin erbättle, hei si mir e Sprütze ggäh won ig mir täglech ha müesse mache. I ha am Kurt zeigt, wien är mir die cha verabreiche...Es het mir so weh tah nachem sprütze, dass ig Daheime, ir Schmärzklinik nachegfragt öb si das Medi kenni. Dört hei si mir empfohle, sofort ufz'höre mit dene Sprütze u mit em nächste Flüger Hei z'gah. Es sygi es Medikamänt wo ir Schwyz vor 40 Jahr us em Verkehr zoge syg worde. Es machi s'Gwäb um d'Ystichstell kaput. Es wärdi aber wyterhin ir Schwyz für Italie produziert.
Won ig i Flüger gstiege bi, het's mi tüecht di andere Passagie syge alli so chic aagleit u gar nid Feriemäsig. Di Dame wo näbe mir isch gsässe het mi gfragt wiso as ig gränni. I ha ihre erklärt, dass myni Familie jetz ohni mi wyter Ferie machi und ig wäge z'wenig Mo Hei müess. Si het glächlet u gmeint: " es sygi so, dass Italie im Bezug uf Schmärztherapie, öppe 40 Jahr hinder der Schwyz nachehinki. U übrigends syge fasch alles Ärzt i däm Flüger. Si heige zäme, in Sardinie e Konferenz gha."
I bi über Rom gfloge u bi vom Schwiegervater in Kloten abgholt worde. Sobald ig mis Morphin ume gha ha, isch es mir ume besser gange...I ha immer meh vo däm Züg bruucht...