I ha mi zrüggzoge gha, allei i ne Hütte. Der Bsitzer vor Hütte isch äxtra für mi go der Ofen aafüüre damit ig nid so muess gfriere. Es het mir guet tah, e Zytlang nume ig u mi Gott...
I ha o mi sälber wieder müesse gspüre...
Uf em Rückwäg han ig fei e Wäg müesse loufe bis zum Ort wo mi der Kurt het chönne hole. Es het früsch gschneit gha u me het d'Ysblattere uf der Strass nid chönne gseh. I ha zwar d'Wanderschueh anne gha aber i bi glych usgrütscht u ha vor Rüggeweh fasch nümm chönne ufstah. Das isch myni ersti Diskushernie gsy. I bi denn drü Wuchen im Spital gläge u ha Physiotherapie gha. Mit der Zyt bin ig uf Burgdorf i d'Therapie zur C. Das het mir aube guet tah.