Hüt isch Zügeltag gsy. Der P. isch ja sit em Mändig hie i de Ferie. Der Kurt, der P. u ig si am Nüni hie abgfahre. Am Zähni hei mir üs ir Bernaville in Schwarzeburg mit em David u der M. troffe. I ha syt Hüt am Morge bym Ufstah furchtbar Rüggeweh, drum bin ig grad mit der M. go d'Ustrittformalitäte go aaluege. Ja, der P. isch lang dört gsy u si löh ihn nid gärn la gah, verstöh aber dass är nach 40 Jahr öppis Nöis wott u vor allem nid zwöi Mal wott zügle. D'Gruppe züglet nämlech i drü Wuche für zwöi Jahr i ne Provisorium. D'Bernaville wird Bodenäbe abgschrisse u am glychen Ort wieder ufgstellt. Es wird e zwöistöckige Bou mit Chlyne Balkönli.
D'Manne hei i eire Stund mit em ne Wägeli der ganz Zimmerinhalt vom P. i Lieferwage tah.
Mir si mit der M. uf Oberbütschel i Sterne. Es isch fei lang gange bis mir Zmittag übercho hei.
Statt am Zwöi, si mir du am 14.45 Uhr im Bärau aacho. Dört hei d'Manne i re Haub Stund mit zwöi Wägeli alles us em Lieferwage is Zimmer ynetah.
Daheime aacho bin ig sofort uf mys Tagesbett go liege u der P. het Fernseh gluegt.