Im Jahr won är Vieri isch worde, si mir ume mit der GVC uf Griecheland i d'Ferie. Mir si denn mit em Flüger gange, das bis uf Athen u vo dört uus mit em Bus uf di östlech glägni grossi Insle Euboa. Mir si dört aacho u der M@i isch diräkt zum Pool gschprunge u is Wasser gumpet. D'Lüt hei ufgschroue, es chlyses Kind sygi i Pool gheit. Er isch dervo gschwumme.
Mir hei Halbpension buechet gha. Jede Mittag hei üsi Kinder Spaghetti wölle. Im Strandbeizli hei si se übercho. Eines Tages het der M@i gfragt, öb är syni Fründin dörf zum Spaghetti ässe ylade. Es isch e Familie mit drü Kinder immer am glyche Strand am bädele gsy. Ihri Tochter d'Danielle isch denn drüü jährig gsy. Si het plötzlech vo Spaghetti afa rede. Äbe a däm Tag het si gfragt, öb si dörf go Spaghetti ässe. Plötzlech syg der M@i bi ihne gstande u heigi si abgholt. Ihre Papi isch ihne nache u het sech gfragt wo häre dä chly Charmeur mit syre Tochter häregöng. Si sy zäme is Beizli a ne Tisch mit drüü ältere Kinder u der M@i het ar Danielle afa d'Serviette über d'Bei gleit. Si hei du zäme syni Spaghetti ggässe. I gloub Hinecht ässe si o zäme Spaghetti mit der Lobpriis Gruppe vor BPlus Konolfinge wo beidi, zwar nid als Paar, mitmache.