Da ig ir Badi Bigle öpperem der "Platz" gnoh ha gha u si mi furt gjagt het, bin ig vo denn aa nümme dört go bade. Mir hei du bi üs e Badi gha. Si isch 1.10m töif gsy u het e Durchmässer gha vo 6 Meter. Üsi Kinder hei alli gärn badet. Es sy immer wieder Kollege u Fründe bi üs cho bade. Der M@i het scho gly keni Fügeli meh wölle aalege. Uf em Bild gseht me e Teil vom brune Töri wo me bir Leitere het chönne zue tue. Am ne schöne Namittag het der zwöi e haub jährig M@i
nid möge gwarte bis öpper ihm d'Fügeli aaleit u s'Töri zum Bad uftuet. Är het e Stuehlstappel wo ir Nächi isch gsy mit aller Kraft zum Bädli Rand gstosse u isch druf gogeret u is Wasser gumpet. Der Kurt het's Gott sei Dank gseh. Är het ihm zuegluegt, het ne lah a d'Oberflächi cho u het ihm gseit: "we Du scho säuber dry gumpisch, de chasch o grad säuber schwümme!" Ja, vo denn aa isch er gschwumme, nid so schön aber är isch vorwärts cho. Wie ne Delfin, isch är unger Wasser gschwumme u het zwüschyne Luft gholt...Uf em Bild macht er grad es Salto...
Mir hei das Bädli gha bis o di zwöi Jüngere lieber säuber i d'Badi sy. Nächär isch es doch z'tüür gsy das z'ungerhalte.