Am Sunndigmorge, nach dere Evangelisationswuche si mir i d'BPlus i Gottesdienst. Ar Sarah isch es gar nid guet gange. Si het Durchfall gha u het in Konolfinge plötzlech afa erbräche. Der Kurt het üs du Hei gfahre. Daheime isch si immer wi apatischer worde. Si het mir gar nümm gfalle. Im Gottesdienst het's d'MPA vom ne Kinderarzt gha. I ha se übere Kurt erreicht. Si het mir d'Handy Nummere vo ihrem Chef düregäh. I ha ihm aaglütte u ihm d'Situation gschiuderet. Mir si nid i syre Kartei gsy. Är isch trotzdäm innert kürzerster Zyt zu üs cho u het sofort e Leitig gleit u ar fasch uströchnete Sarah en Infusion ggäh. Der Krankewage het üs mit Blauliecht is Kinderspital gfahre. Wo di Pflegende vernoh hei, dass ig gly Termin heigi, si sy närvös worde. S'Frouespital Bärn isch denn no dört gsy wo Hüt d'Uni für Rächt isch... I ha o i dere Nacht nüt gschlafe, bi äuä no geng troumatisiert gsy vom Ufenthalt nach der Füess OP. Mit hei am Namittag abgmacht gha, dass der Kurt mit de Buebe zur Sarah is Spital chunnt u ig mit ihne ume Hei gieng um doch no ei Nacht z'schlafe. Es isch du anders cho...S'Fruchtwasser isch mir kurz vorhär broche. Mir hei du s'Grosi uf Biglen bstellt. S'Gotti vor Sarah isch zu ihre is Spital cho, ihre Maa het d'Giele uf Biglen gstellt u der Kurt u ig si uf Münsingen i Gebärsaal. Chuum si mir dört gsy, isch ume nümm gange. Um Mitternacht um, hei si der Kurt Hei gschickt. Si hei mir ume wöue Valium gäh...I bi gfüehlt di ganz Nacht umetigeret. Am haubi Vieri han ig mi Maa ume zur Syte wöue. Am 11.11.1997, isch üse Mätthi am Morge früeh, unger em Lavabo uf em ne Mätteli uf d'Wält cho. Mir si nid lang im Spital blybe. Es hei sech alli Daheime uf üs gfröit. Är het sech o gly gärn mit üs a vielem gfröit.