Hüt am Morge isch ir Livenet Pouse e grossi Ermuetigung vom Phil Eggimann a üs cho. 1. Gott git u nimmt. Är isch d'Quelle vo allem Guete u git üs, was mir bruuche. 2. Zfriede sy mit däm wo mir hei. 3. Nid links u rächts luege, eifach üse Wäg mit Jesus gah. I bi froh muess ig nid geng mit anderne verglyche.
Am Mittag han ig es Rindsragout mit Härdöpfu, Zibele u Sellerie gmacht mit Salat derzue.
Am Namittag han ig d'Mamie mit em Copen gholt. Es isch würklech luschtig, wi si y und usstygt. Si füehlt sech denn immer Jahrzähnte jünger...Mir si zäme, mit offenem Dach i MosaikTräff. Dört si mir nün Froue gsy. I ha grad zwöi wunderschöni Rosestrüss übercho. Es het guet tah chly use z'gah. Mir hei o bym Hei gah s'Dach chönne offe ha. Jetz rägnet's ume.