Gester am Abe hei mir e liebe Bsuech gha wo mit em ne feine Znacht uf Bsuech cho isch. Es isch e schönen Abe gsy! Ir Nacht het mir der Thorax weh tah, e so dass ig nid guet gschlafe ha...
Am Morge bin ig am Achti go der Even goume. Sys Mami isch mit em Aiden wo hüt Geburi het i Kindergarte. Si isch no go poste u ig bi du nächär Hei go choche.
Es het viel Räschte ggäh, Härdöpfusalat, Spagghetti, Hörnlisalat, Kabbissalat u ig ha no Zucchetti u Aubergine mit Käs u Späck im Ofe gmacht. Am Namittag bin ig mit em Copen uf Burgdorf zur C. i d'Osteopathie. Si het mir guet chönne der Thorax löse, es tuet mir nüm e so weh. I ha uf em Heiwäg der Miggi ufglade wo o grad e Termin het gha u mir hei mit offenem Dach umefahre. Mir sy zäme zum Grandmaman wo üs zum Geburtstag vom Miggi het e Glace spändiert. Die si vor Läbensart vor Wägmatte im Truebschache u si ganz fein. Es het vorhär u nächär grägnet, was het abe möge. I bi sider Daheime am liege...Hinecht hei mir nüt los...