Am Frittigmorge bin ig ume is Timeout go bade. Nächär bin ig zum Türk go ychoufe. D'Sarah het no Räschte mitbracht. Mir hei o no Brötli gha. Es het feini Hamburger vom Obertal ggäh. Am Namittag si di Junge hie cho bade. Es isch o für si kalt gsy. Si hei's aber gnosse. Am Abe si de Kurt u ig mit em Copen uf Thun. Mir hei Im Bar Atelier mit S's. abgmacht u hei e gmüetleche Braschti-Abe gha. Gester bin ig am Morge vor de Nüne scho mit em Kurt is Bädli. Er het's dür d'Nacht ufgheizt gha, so isch es geng no über 30 Grad warm gsy. Am Mittag hei mir mit em Hugi u syre Familie abgmacht. D'Jael isch scho vorhär zu üs cho. Nach em feine Brätli-Zmittag, si mir alli i Pool. Es isch geng no warm gsy. D'Buebe hei fasch nüm use wölle. O mir Erwachseni si länger drinne gsy als süsch...Es isch e gmüetleche Namittag gsy. I ha ne 11kg schwäri Wassermelone bim Türk gkouft gha. Mir hei se gwüss fasch ganz vertrommet. Si isch sooo fein süess gsy! Am Abe het d'Jael entschiede hie z'schlafe. Am Nüni het si gfunde: "Grossmami, mir göh jetz is Bett!" I bi grad froh gsy is Bett z'dörfe. Mir hei zäme im grosse Bsuechszimmer gschlafe, de het der Poppeli(Grosspapi,Kurt) syni Rueh gha. Hüt am Morge het's am 6.45 Uhr Tagwach ggäh. D'Jael het gmeint: "Grossmami, i ha myni Eltere vermisst aber es isch coolgsy bi Dir z'schlafe. Göh mir jetz go Zmorgen ässe?" Der Poppeli isch du o grad cho u isch nächär no Mal go liege. I liege jetz o i mym undere Zimmer...Hüt am Nami isch hie bi üs, am Aiden sys Geburifest mit der Bläuer Sippe. I blybe mit der Jael Daheime u der Kurt isch grad i Gottesdienst. Si isch im Momänt am Globi lose u am zeichne.