Wo d'Sarah keni Gipsli meh het gha, sy mir uf Kalabrien i d'Ferie. Es isch i re schöne, umzuunete Hotelalag gsy umgäh vom ne Piniewald. Der Wäg zum Strand het mit em Kinderwage chly müehsam über Brätter, dür e Wald gfüehrt. A eim Tag hei mir es speziells Erläbnis gha. Mir sy gäge Strand gloffe u der knapp füf jährig Stephan isch voruus gsprunge. Är isch ohni gross z'überlege diräkt is Meer gsprunge. Es isch e grossi Wälle cho u s'het ihn "gwöschmaschinelet" Da isch ufs Mal e Maa bi ihm gsy wo ihn us em Wasser treit het u ihm uf Bärndütsch gseit het:"tue hie warte, der Papi u s'Mami chöme grad!" Wo mir aacho sy, isch der Stephan scho nass gsy u het umegluegt u gfragt:" wo isch der Maa?" Er het üs verzellt, was gsy isch u der Kurt isch mit ihm der ganz Strand uf und ab u si hei dä Maa niene gfunde.
Isch es ächt en Ängel gsy?