Es wär d'Meinig gsy, wöchentlech di Gipsli go z'wächsle. Di erschte zwöi Mönet isch es gange. D'Sarah het du mit zwöi Mönet e so ne Bewegigsdrang gha, dass si's gschafft het di Gipsli abz'strample. Wenn ig se am Morge bi us em Stubewage go näh, de isch entweder links oder de rächts, es Gipsli näb ihrem Bei gläge. Vom 21.12.1995 bis Mitti April 1996 si mir 24 Mal im Kinderspital im Gipszimmer gsy...Der Spezialist für Klumpfüess het du gfunde e so bring's nüt meh z'gipse. I bi du nach der Operation 13 Nächt mit der Sarah im Kinderspital gsy. Müesst nech vorstelle: d'Sarah isch a Händ u Füess am Bettli aabunde gsy. Zum stille han ig irgendwie müesse uf ihres Bettli klättere u ihre so d'Brust gäh. Da mir im ne Zimmer si gsy mit 5 anderne Kiddies, eis anders het s'Mami ganz bi sich gha, bin ig ir Nacht vom Einte zum Andere go der Nuggi ynestosse. I bi nach dere Zyt fix und foxi gsy...D'Sarah het nach der Operation während acht Wuche di glyche Gipsli gha. Das het obe und unger so richtigi blaui Würst ggäh...Si isch ja glych gwachse...Afangs Ougste isch si u mir o befreit gsy.