Am 19.12.1995 het der David im Kindergarte e Vorfüehrig gha u ig bi uf sym chlyne Stuehl ghocket. Am früeche Morge han ig du Wehe übercho u mir si uf Münsige is Spital. Sobau ig dört bi gsy, hei si ufghört. Ig bi umetigeret, ha zwüschyne badet u d'Hebamme hei mir am Abe es Valium ggäh, dass ig mi no chönni erhole...Das het nüt gnützt...i bi wyter umetigeret u der Kurt isch mir guet bygstande. Am 20.12.1995, am 23.55 Uhr isch üsi Prinzässin uf d'Wält cho. Da di jüngeri Schwöschter vom Kurt am glyche Tag geburtstag het, heisst üsi Tochter Sarah-Franziska. Nach zwöi Kaiserschnitt han ig eigetlech di erschti natürlechi Geburt gha. Si het lang duuret aber i ha nächär z'Gfüehl gha, i chönnti go Bäum usschrysse. Nachdäm alles fertig isch gsy u d'Sarah vom Papi bädelet isch worde, het mir der Arzt erklärt dass d'Sarah Klumpfüess heigi u am nächst Tag scho i d'Insel müessi. I ha ihm gseit i heigi gwüsst, dass si öppis het. I ha mir aber ganz anderi Behinderige usdänkt gha, nach em Troum vom Mamie. D'Sarah het also am 21.12.1995 a beidi Bei, vo der Liste bi zu de Zäie Gipsli übercho. Da si no chly gälb isch worde u es paar Tag i Inkubator(Brutkaste) unger d'Lampe het müesse, sy mir e chly länger in Münsingen blybe. I ha's gnosse, mit ihre zäme d'Wienacht im Spital z'erläbe. S'fyyre hei mir nächär Daheime nachegholt.