I mälde mi zrügg, nach em ne wunderschöne Wuchenändi in Einigen. Am Samstig han ig dörfe a eim vo de schönschte Hochzyt won ig je erläbt ha teilnäh. Es isch es ryyse Privileg, e so ne tolli Familie dörfe z'ha. I bi voller Muetterstolz! D'Sabrina u der Matthias hei es super Team engagiert gha wo nes Fest organisiert het wo ihne total entsproche het. Das sy: zwöi Fründinne vor Sabrina gsy, d'Sarah u der Pascal u beidi Brüetsche, David u Stephan. Das Team het sech guet ergänzt. S'Wätter hät nid besser chönne sy. D'Trouig het im Park under de grosse Bäum, näb em Schlössli "Le Rüdli" stattgfunde. E Bänd us der BewegungPlus Thun het üs mit vom Paar usgläsne Lobprys Lieder begleitet. Der Christian Ringli het d'Trouig mit uf's Paar zuegschnittne Wort ghalte. Es isch viel glachet worde u einigi Kirchefärni Gäst hei gmeint, si würdi für settigi Predigte sogar i ne Kirche gah...D'Kulisse für schöni Fötteli isch mit der wunderschöne Ussicht uf e See oder näb em Schlössli ggäh gsy. Es hei öppe 150 Lüt ar Trouig teilgnoh.
Am Abe hei di 50 gladne Gäst am ne glungnige Fest mit coole Byträg, gueter Musig, Tanz u feinem Ässe chönne teilnäh. Der Hugi isch o derby gsy. Dä cha me engagiere: http://www.komiker-hugi.ch I ha's bis am ofizielle Schluss um di Eis am Morge chönne gniesse.
Es het Zimmer im Schlössli u 26 Lüt hei dört übernachtet. Es isch so schön gsy, im ne Zält näb em Schloss mit offener Syte i Richtig See z'zmörgele. Es hei so viel mitghulfe bym ufruume, dass mir am 13 Uhr scho hei chönne vom Festplatz abfahre u bis mir alles verteilt hei gha isch 15.30 Uhr gsy.