Sächs grossi Louchstängle han ig z'ersch blanchiert u nächär gsalze u mit ere Béchamelsauce, Rybchäs u em ne Pfund Späck deckt. Derzue, han ig Ofehärdöpfu gmacht. I ha für jedi Person drü Härdöpfu grächnet. Es isch alles rübis u Stübis wäg. Mir si z'füfte höch am Tisch gsy...
D'R. han ig grad zum Ässe yglade gha, de het si Mau nid müesse choche. I ha nämlech mit ihre abgmacht für is TimeOut. Mys Abo isch bis Ändi Juni verlängeret worde. Da isch d'Migros scho grosszügig, dass ig solang der Wellnessberych zue isch gsy, nid ha müesse zahle, respektive mys Abo wär abgloffe aber si hei's verlängeret...Mir hei s'Solebad ganz für üs gha. Es si no zwöi ander Lüt im Wasser gsy, die hei aber gsprudlet...Im Dampfbad vor Frouesyte het's scho zwöi Froue drynne gha. Es dörfe drü Lüt dynne sy. Mir si du i di gmischti Zohne. Dört hei mir s'Dampfbad für üs gha. Mir si nach ere gwüsse Zyt glych ume is Froue Dampfbad. Dört hei mir üs mit der Arad - Salzbutter ygschmiert. Es het üs beidne guet tah. Mir si nächär es Momäntli use, a Schatte. D'R. het mir der ergonomisch agnähme Sässel usegnoh. Wo mir wyter gange si, si grad drü Froue usegläge. Di einti het o grad gärn der Sässu bhalte...
Mir hei üs aagleit u sy is NiceCream go ne feini Glace ässe. Vis à vis isch der Türkelade Rami u ne Denner. Ig ha grad ygkouft u d'R. het mi ume Hei tah.
I bi grad sofort go liege...Zum Znacht han ig früschi Artischoke i Duromatik tah. Der Kurt het du e Vinaigrette derzue gmacht. Mir hei chönne dusse ässe. Es fägt, dass s'Wätter vo jetz aa bis nächst Wuche, jede Tag wärmer wird...Är het Hinecht Gmeindeleitersitzig...