I ha bir letschte Kontrolle vor de Ferie bym Frouenarzt gseh, dass s'Bebe ir Steisslag isch. Wo mir in Petra si gsy, han ig mit üsere ältischte Reiseteilnähmerin uf em ne Wage wo vom ne Ross zoge worden isch der Rückwäg dörfe ryte. I ha am Abe gwüss wildi Wehe gha...Wo mir im Flugzüg in Züri am Lande si gsy het mys Bebe sich gkehrt. I ha denn grad müesse liege, e so hets tah i mym Buuch...
Wo mir es paar Tag ume Daheime si gsy, het mys Mamie ihre ganz Muet zämegnoh u mi gfragt, öb si mir ihre Troum dörfi verzelle. Si heigi tröumt, dass mir es Meitli überchömi. I ha se usglachet u gseit i gloubi ihre, dass si sech en Änkelin wünschi nach sächs Änkle. Si het du gmeint, das Meitschi heissi Sarah. Da bin ig scho ufmerksamer worde. Der Kurt u ig hei nämlech niemerem gseit, dass mir dä Meitschiname usegläse hei gha. S'Mamie het aber no tröumt, das Kind heigi öppis u si föng scho sofort afa bätte derfür.
Mitti Novämber het mi der Dokter hospitalisiert, da üses Bebe z'früeh het wölle cho u derfür no z'chly wär gsy. Di erste Nächt bin ig allei im ne Zimmer gsy. Im Zimmer näbedraa isch e Frou us em glyche Grund gläge. Si hei üs nume wäg der Versicherig nid zämetah. Si isch allgemein u ig halb Privat versicheret gsy. Mir hei üs im Gang troffe gha u hei bir Pfleg so lang gstürmt bis si üs doch zäme i eis Zimmer tah hei. Am Verhalte vo den Ärzt het me der Ungerschied gmerkt u süsch gar niene. Ihren Arzt het immer z'erscht mi grüesst u mi Arzt het se gar nid beachtet. Wo myni Zimmernachbere gfragt het, öb mir nid Hei chönni, da mir beidi Daheime gnue z'tüeh hätte, het ihren Arzt gmeint: De göht doch Hei. De git's de eis wo zu de Hüener cha luege...Si isch nämlech e Buurefrou gsy...Es anders Mau bin ig vom Spaziere zrüggcho u bi ihm im Lift begägnet. Är het gseh, dass ig grännet ha gha u het du gmeint: gheit nech d'Dieli uf e Gring? Müesst ufpasse, di het de Sprysse...My Arzt isch e Wuche i de Ferie gsy, da isch ihren Arzt zu mir cho u het gmeint: "darf ig Morn mit de Studänte mit em Ultrashallgrät öies Bebe luege? Das het es bsunders chlyses Grindli." Der Kurt isch denn grad da gsy won er du cho isch. Plötzlech het er gseit: "wüsst dir scho was es git?" Mir hei beidi gseit, mir wölli's nid vorhär wüsse. Da het er gmeint, de müesst dir jetz d'Ouge u d'Ohre zuetue. Es git de nüt meh vo Brüetsch...
I bi du froh gsy, dass mi Arzt zrüggcho isch u mi no Hei gschickt het. I bi ganzi zwöi Wuchen im Spital gsy.