Der Kurt u ig sy paar Jahr vorhär scho Mal gsy, wo mir no kener Kinder hei gha. Mir hei üs denn dört mit em ne Päärli troffe wo mir kurz vorhär bi ihrem Hochzyt sy Brutfüehrer gsy. Mir si mit ihne vor allem in Jerusalem gsy u nächär uf em Heiwäg via Tel Aviv. Mir hei denn e spezielli Begägnig gha in Jerusalem. Mir hei d'Westmuur gsuecht u hei scho chly suechend usgseh. Da isch e "gschnäuzlete" uf üs zue cho u het gfragt, öb er üs chönni hälfe. Mir hei ihm vo Afang aa gseit, mir bruuchi ke Guide. Er isch üs di ganz Zyt nachegloffe het üs plötzlech gseit, mir sölle ihm nache. Er isch mit üs uf d'Dächer vor Altstadt u het üs vo Obe d'Westmuur zeigt. Er het üs aaschliessend i ne Sackgass gfüehrt u het gseit är wöll jetz Gäld. Der Maa vom andere Paar het s'Portemonnaie uftah u het im Münz gkrauet. Der Typ isch agressiv worde u het gseit är wöll ke Münz, är wöll Achzg Dollards. Mir sy konsterniert gsy. Uf s'Mal het dä Typ grossi Ouge gmacht, isch hindertsi us der Sackgass u isch dervo gsecklet wi vor Tarantle bisse. Mir hei üs alli aagluegt u hei eis nach em andere gseit:" i ha eifach bättet!"
Am nächste Tag sy mir im gmietete Outo uf d'Outobahn vo Jerusalem Richtig Tel Aviv. Es het ke Verkehr gha. I bi wi ir Schwyz 120Km/h gfahre. Da hets es Outo am Strasserand gha u öppe ne Kilometer wyter, e Polizist wo uf der Überhollspuur gstanden isch u mir mit Handzeiche z'verstah ggäh het, dass ig muess halte. I bi a Rand u är het mi gfragt, öb ig wüssi wi schnäll me hie dörfi fahre? I ha ihm zueggäh, dass ig söfu gfahre sygi wie Daheime. I hät nume 90 Km/h dörfe fahre...Es sygi so wenig Verkehr gsy und i heigi das nid gspycheret gha. Er het mi Uswys gnoh, isch zu sym kolleg füre, isch zrüggcho u het mi gfagt, wenn as mir Hei gönge. I ha ihm gseit, mir müessi am Übernächste Tag scho ume Hei. Er het mi no gfragt wien ig heissi u het nächär gmeint: Christine, be carefull, go! Was heisst: Christine, bis vorsichtig, gang!