O we's vorhär für mi schwär isch gsy es Bebe ir 14. Wuche verlore z'ha, han ig gly tschegget dass di Geburt grad voll i di intensivi Zyt vor züglete wär gsy. Gott het's scho gwüsst... Wo mir in Biglen yghüselet si gsy han ig gmerkt, dass ig ume schwanger bi. I ha mi also ume chönne druf fröie u mi i aller Rueh druf vorbereite.
I ha vom ne Zwüschejahr ghört wo d'Modis 2,5 Täg im ne Huushalt sy u 2,5 Täg ir Schuel. Das het mir o passt, dass di Modis Daheime gwohnt hei u nid ir Familie wo si gschaffet hei. I ha für das no Kürs müesse bsueche. Die sy nid alli bruuchbar gsy. Vor allem d'Kochkürs...Die Froue wo Modis gnoh hei sy meistens Müettere gsy vo mindestens drü chlyne Kinder oder Buurefroue mit grossem Hof. Di Kochlehrere isch e alleierziehendi Frou mit eim Kind wo üs het Bio u süsch Vollwärtkost wölle bybringe. Nachdäm si gmerkt het, dass es nid so aachunnt het si üs Mal gfragt, was mir für Rezäpt wünschte. Mir hei du gmeint: es sött günstig sy u i kurzer Zyt grossi Mängine Food. Da isch si masslos überforderet gsy...Mir hei no paar vollwärt Rezäpt glernt. I ha gloub einisch so öppis gkochet aber d'Kinder hei's nid gärn gha...Der Räschte isch Widerholig vom Hushaltlehrjahr gsy...
Nün Modis hei du bi üs, nach der Schuelzyt, eis Jahr lang i üses Familieläbe ynegseh. Di meiste sy üs e grossi Hilf gsy u bi anderne hesch es Kind meh gha. I bi sehr dankbar gsy für di Modis wo zu Froue worde sy. Mit der Einte oder Andere han ig no jetz Kontakt.