Hüt han ig e ganz e fuule Tag gha. Am Mittag isch d'sarah mir cho hälfe choche: Rindsgschnätzlets, Polenta u Salat. Ihri Fründin wo hie im Kindergarte schaffet isch zu üs cho ässe.
Di grösseri Frou wo uf em Bild isch het mir Hüt ume Injera bracht u derzue es Linsegricht. Denn wo das Fötteli isch entstande, isch e Sunndig gsy u myys Mameli u ne Cousine vom Papi wo bi üs ir Kirchen isch sy denn mitcho. S'Mamie het aube im Mosaikträff di Froue gseh u s'H. het mir vor Jahre bir Ufgabehilf ghulfe u het denn Injera kenne glernt. Es isch es Zwärghirse Gricht wo in Äthiopie, Eritrea u im Sudan gmacht u ggässe wird. Es sy so Flade wo usgseh wi Ommelette wo nume Eisittig sy gmacht worde.
I bi so froh, göh alli andere für mi go ychoufe...I ha s'App "Bring" uf em Handy u tue aube das druf won ig bruuche. Di meiste vor Familie hei o das App u wenn öpper vo ihne im ne Laden isch, de luege si was mir bruuche u poschte's. Si chöi nächär druf drücke u de isch s'gwünschte Produkt nümm druf.