Da si nid so viel los hei, sy der Kurt u ig zur Abwächslig am Frittig wieder Mal uf Wilderswil gfahre. Mir hei der Copen gnoh. Der Kurt het myni Tempur Matratze müesse us der Täsche näah u se nume zämegleit i Kofferruum tue. Süsch hät s'Dach vom Copen nid Platz gha, obe druf...I ha d'Reisetäsche unger d'Bei gnoh o s'Handtäschli uf d'Bei. Am Abe sy d'Schwiegereltere vom M@i cho. Mir hei no paar Sache z'bespräche gha für nächste Samstig. I freue mi megamässig uf's Hochzyt!
Gester sy mir nach em Zmorge uf Interlaken go Schueh choufe. D'Yvonne het mir e Laden empfohle. I bi dört yne, ha gseit was i bruuche. Si het mir es Paar Schueh füreggäh, i ha se aagleit u das sy se gsy. I ha no nes schöns Täschli derzue kouft so für d'Nastüechli u s'Handy ;-)
Nach em ne feine Zmittag bin ig go liege. Myni Füess sy no beidi gschwolle...D'Schueh hei so ne breite Rieme überem Rist wo mit ere Schnalle u drü Löcher chasch zue tueh. Im Lade han ig se guet zuebracht. I bi zueversichtlech, dass der Gschwullscht bis am Samstig no meh zrügg geit.
Am Abe sy mir beidi müed gsy u sy früeh is Bett.
Hüt am Morge hei üs d'Sunnestrahle gweckt. Mir sy nach em Zmorge, mit offenem Dach Hei gfahre. Chuum bin ig Daheime gsy, het's afa rägne. Der Kurt isch grad diräkt go s'Mamie hole für i d'Kirche. I wirde vom M. abgholt. Mir träffen üs Hüt in Bärn mit allne wo vorletscht Jahr mit üs in Israel u Palästina gsy sy. I bi gspannt, was si alli z'verzelle hei...