Beidi Giele hei immer wieder der Faltsch Krupp oder o Pseudokrupp gha. Der Huusarzt het mir sogar sys Hometelefon ggäh u gseit, i dörfi jederzyt aalütte. I ha das einisch gmacht gha wo der David so bällend u pfyfend ghueschtet het. I ha ihn über heissem Dampf probiert z'ha u s'het nüt gnützt. Es het nid der Arzt, sondern syni Frou s'Telefon abgnoh. Es isch zmitts ir Nacht gsy u si isch gar nid begeisteret gsy, dass ig se gweckt ha. I ha se verstande, dass si usgrüeft het. Der Huusarzt het ihre du s'Telefon abgnoh u het sich für ihri Reaktion entschuldiget. Er het mir empfohle der Bueb warm aaz'lege u mit ihm use z'gah a di früschi Luft. Am nächste Tag han ig e schöne Bluemestruss ar Frou vom Arzt lah bringe. Si het mir du aaglütte u mir hei fasch e Stund zäme gredt. I ha ihre danket u si mir...I bi s'Gfüehl nid los worde, dass si chönnti fei einsam sy...I ha ihre gseit, dass ig würklech nid wett mit ihre tuusche u o nid so gärn mi Maa mit allne syne Patiente würdi teile...
Es het sech bestätiget, dass d'Buebe Müeh hei gha mit de Huusmilbe u o no mit de Gschmäcker im Neubou. I bi nach der Züglete innerhalb vo Zäziwil einisch mit de Buebe uf Braunwald is Bijou das isch s'Feriehüsli gsy vo myre Schwiegermuetter. Es anders Mal bin ig mit ihne is Schlegeli is Hari.
Der Dokter het üs also ume empfohle für mindestens drü Wuche i d'Höchi z'gah. Da han ig beschlosse mit der Tanja u beidne Giele is Pizol bi Bad Ragaz z'gah. Mir hei Fründe wo denn dört es Jugenhuus gfüehrt hei. Mir hei no am Füfi mit em H. wölle go Pilze sammle. Es isch so gsy, dass am Vieri di letschti Gondle gfahren isch. I ha der Stephan a der rächte Hand gha u är isch usgrütscht. Er het es paar Wuche vorhär sy rächt Ellboge usgränkt gha u ig ha das nümm ir Rächnig gha. Es isch wieder passiert...Da tuet der Arm eifach abelampe u s'Chind schreit nume no...I ha my ganz Muet zämegno u ha a sym Arm gschrisse u ne e chly dräit, dass es wieder ygränkt het. Mir hätte süsch müesse der Heli lah cho...Das isch en Ufregig gsy!