Ja, der Eggimann vo Bigle het hie wölle boue u der Bläuer z'Zäziwil. Me seit ja, der Prophet gilt Daheime nid viel...Si hei beidi Schwierigkeite gha...So het der Eggimann am Bläuer syni Fabrik in Zäziwil kouft u het meh chönne usboue als der Bläuer hät wölle...Mir hei in Bigle derfür ke Problem gha mit üsem Neubou. So sy beidi guet ewäg cho...
Es het sech scho fei e chly War aagsammlet gha. Me isch halt nie so ryych wi we me züglet! Mir sy i nes nöis Huus hinger der nöie Fabrik mit zum Glück sächs e halb Zimmer u 140 Quadratmeter Wohnflächi.
Was gäbig isch: z'ungersch isch s'Büro u es isch im Glyche Styl Boue wi d'Fabrik. D'Husierer chöme nid bis zu üs, da si meine es sygi alles Indusrie...
Vor Stuben uus hei mir Blick uf d'Jungfrou u süsch no d'Bärner Alpe. Mir hei für beidi Wohnige der Ygangsruum, e grosse Käller u ne Wöschchuchi im erste Stock. Der Grossvater Bläuer het sech im Käller vor Wohnig vo näbedraa, es Studio ygrichtet. Über ihm isch e vier e halb Zimmerwohnig. Es isch am Hang boue u drum sy im zwöite Stock vo unger, d'Chuchine es WC bi üs mit Dusche u no em ne Zimmer u d'Stubene mit Sitzplatz mit em ne Wägli wo zum Parkplatz uf d'Mutti füehrt. Z'oberscht sy de d'Schlafzimmer.