Ja, mys Klavier hei d'Zügelmanne nid wölle ufemurkse, denn wo mir i Stock sy. Es isch für di anderthalb Jahr wo mir dört gwohnt sy, Fründe wo bodenäben wohne i d' Stube gstellt worde.
Es isch spannend gsy, sälber chönne d'Plättli, d'Chuchi, d'Böde, d'Sunnestore, der Teppich ja eifach alles wo's bruucht im ne neue Huus usez'läse. Mir hei mit em Architekt chönne üsi Wünsch aabringe u bespräche. Är het se de umgsetzt.
Einisch won ig mit de Buebe uf Bigle zur Boustell bi, het's grad zwöi Froue gha wo am spaziere sy gsy. I ha grad ghört wi di Einti der Andere gseit het:" das wird sicher üsi Luft verpeste, die Fabrik." I bi zu ihne häre u ha mi vorgstellt. I ha se chönne beruhige i däm ig ihne d'Grössi vo der Filteraalag u vom Silo erklärt ha.
Mir sy du im Ougust-Septämber 1994 uf Bigle züglet. Der Mäni u d'Tanja sy i d'Wohnig näbedraa.