Mir hei üs vorbereitet fürs Zügle uf Biglen. Die Wohnig im Stock in Zäziwil isch schön gsy aber mit chlyne Chinder nid so gäbig. I ha geng mit use müesse u ha s'Gfüehl gha i syg immer am putze. Es het im Gang u ir Chuchi e dunkelgraue Plattebode gha u me het gfüehlt jede Tritt gseh...
I ha tagewys am "Jesus-Marsch fürs Emmental" Aalass teilgnoh. I dere Zyt han ig gmerkt, dass ig schwanger bi. Es isch mir nid so guet gange u ig bi es paar Mal byr Frouenärztin gsy. Die het mir immer gseit, i söu liege...wi wosch de mit zwöi giele vo vier u zwöi Jahr liege? A eim Abe bin ig mit myre Muetter go der Film:"Schindler's Liste" luege. Dä het mi so berüehrt, dass ig mi fasch nümm ha chönne erhole. I ha ir Nacht druf mys Bebe verlore es isch ir 14. Schwangerschaftswuche gsy. I ha der Ydruck, es isch es Meitschi gsy. I wirde se im Himmu gseh...Won ig druf abe en Uskratzig ha bruucht u im Beausite gläge bi, han ig fasch düredräit. I ha so stark die Bebes gspürt wo dört abtriebe sy worde. E mir bekannte Pfleger wo denn grad Nachtwach gha u mi betreut het, het's mir bestätiget. Si hei dört Bebes abtriebe wo anderne Orte nümm abtriebe würde. Das heisst, bis im nünte Monet...i ha nid nume um mys Kind truuret...
Won ig bi der Gynäkologin öppis vo mym innere Kampf verzellt ha het si gmeint, i söll nid mi Fruscht a ihre uslah. I ha mi du bi ihre verabschiedet u ha mir en anderen Arzt gsuecht.