Am Gartenweg sy mir paar hundert Meter vom Bädli gsy. Dört isch der Kurt uf d'Wält cho. Später hei Bläuer's ir Leime d'Fabrik u z'oberscht e grossi Wohnig bout. Dört isch der Kurt bis elf Jährig gwohnt. Denn sy myni Schwiegereltere usenang u da isch sys Mami mit de drüü Kinder zrügg is Glarnerland.
Zu dere Zyt wo mir in Zäziwil gwohnt sy, isch s'Zäzigrosi, d'Klara Bläuer ir grosse Wohnig gwohnt. I bi ihre ab und zue go hälfe es Bad z'näh. Si isch scho wyt über Achzgi gsy. Bis si ir Badwanne isch gsy, het si mir alli wüeschte Näme ggäh. Da bin ig es Räf gsy, es Haaghuuri u süsch e Bösi. Wenn si wieder aagleit isch gsy und ig ihre d'Haar gföhnet ha, da bin ig e so ne liebi u sogar es Schätzeli gsy.
Üsi Buebe hei ganz gärn i däm grosse Sandkaste im Rase vom grosse Garte gspielt. Me gseht grad uf em Bild es Lieferwägeli dürefahre...
Wo der David öppe drüü Jährig isch gsy, isch er Mau is Badzimmer cho u isch uf d'Waag gstiege, het gmeint:"jetz wott ig mau mässe wi alt dass ig bi. Ah, ja 'ha scho dänkt: Vierzäh Meter!"