Es isch nid lang gange, da sy üsi Nachbare wo ungerdessi Fründe sy worde i d'Pfarrwohnig züglet. Ihri Kirche het oben im Dorf es Drüüfamiliehuus umbout u si hei dört di mittleri Wohni übercho. Kurz druf abe het üs üse Vermieter d'Wohnig zum Chouf aabotte oder de göng är sälber dry. Da mir ir Planigsphase vom Neubou in Bigle sy gsy, hei mir di Wohnig nid wölle choufe. Im Stock wo üsi Fründe häre züglet sy isch no d'Dachwohnig frei gsy. Da sy mir scho gly ume zäme gsy. Es isch für e Kurt nächer gsy i d'Leime. Da het är nume über d'Strass müesse u hundert Meter ufeloufe. Bi däm Huus het's e schöne Garte gha u ne Rase. I ha d'Giele nid allei chönne uselah, wäg der gfährleche Houptstrass näbedraa. Es isch aber für d'Giele cool gsy mit de Nachbersgiele chönne z'spiele u mir Froue hei mängs Kafi zäme drunke.
Ganz am Afang han ig probiert mit em David Französisch z'rede. Es het ihm gar nid gfalle u ig bi o nid konsequänt gsy. Mir hei wieder Mau zäme am Verkehr zuegluegt wo a üsem Huus verbygfahren isch. Wo ne Lastwage cho isch han ig gseit:" lueg dä Lastwage!" da het der David gmeint, "Nei! Das isch e Wastlage" i ha erwideret, "Nei, e Lastwage." Da isch är hässig worde u het gmeint "ig wott nid Lastwage säge, i säge Wastlage!" Wo der nächst cho isch, han igfragt:"was isch das?" da het är gmeint:"e Camiong!"