Het das guet tah, Fründinne vo früecher ume z'gspüre. Si hei grad Znacht bracht u s'H. no schöni Rose us em Garte. Die syge vom ne ganz alte Rosestock u die Rose schmöcke himmlisch! Si sy du uf e viertu ab Nüni Zug u ume Hei. Es isch interessant, dass mir all drü nüm ir Pfleg schaffe.
Hüt han ig wieder Mal e "Sauerkraut Gratin Siebenbürgen" gmacht. E so isch Suurchabis fein!
Am Namittag han ig e Termin gha bir C. I ha der Copen gno. Nach Hasle, han ig müesse s'Dach zue tue. Es het es paar Rägetröpfli ggäh. I ha in Burgdorf mit em M. abgmacht wo o grad dört e Termin het gha. Won ig uf ihn ha gwartet, isch e Frou näbedüre gloffe won ig vo Hie ume vor Jahre kennt ha. Si het mi o grad kennt u verzellt, si sygi di letschte Acht Jahr i ihrer alte Heimat gwohnt. Innert kurzer Zyt heig si zwöi Brüedere verlore wo zäh u dryzäh Jahr jünger syge gsy. Si u ihre Maa heige nächär entschiede is Bärnbiet zrügg z'cho. Si heigi am Frittig d'Zittig Hope Emmental düreblätteret u mys Interview drinne gläse. I syg ihre s'ganze Wuchenändi nid us em Sinn u jetz gsäch si mi hie...das gäb ihre z'dänke. Mir hei du zäme brichtet bis der M. cho isch. Uf em Heiwäg bin ig mit em M. no go nes Tüürli dräie. Mir sy übere Talgrabe u d'Tanne no hurti uf d'Gumm go kehre u nächär han ig ihn über s'Chlyyrot uf Höchi gstellt.
I ha Daheime d'Post erläse u bi derby ygschlafe... Kurt u ig hei zäme Znacht ggässe. Hinecht luege mir no "um Himmels Willen!" nächär gahn ig gly is Bett.