Nid wyt vom Mooswäg het's es Lädeli gha. Dört het's fasch alles ggäh wo me so bruucht, hesch di aber nid dörfe sälber bediene. D'Frou S. isch da sträng gsy! Won ig es paar Mal im Lädeli bi gsy het si mi gfragt, öb ig nöi da wohni u wien ig heissi. I ha g'antwortet i sygi nöi da u heissi Bläuer. Si het du grossi Ouge gmacht u gfragt, "jä Bläuer vo der Fabrik ir Leime?" i ha du gseit, ja d'Frou vom Junge. Won ig z'nächst Mal i dä Lade bi, hets scho drüü Froue gha wo bym Gmües gwartet hei bedient z'wärde. Da het sech d'Frou S. zu mir dräit u fragt:"Frou Bläuer, was chan ig öich gäh?" I bi du fasch ume hingerzi druus u ha gmeint:"es sy doch anderi Damen am Warte, i mäldi mi de scho!"
I ha gmeint gha, es sygi nume in Afrika so mit de Wysse u Schwarze oder Ryyche u Arme wo me anders behandli...