Es isch e schöni Parterre Wohnig, am Moosweg in Zäziwil. Im erste Stock, grad obe a üs het der dennzumalig Pfarrer vom EGW (Evangelisches Gemeinschaftswerk) mit syre Familie gwohnt. Si hei zwöi buebe gha u mir eine. Scho gly hei mir gmerkt, dass mir fasch glychzyttig es nächsts Baby wärdi übercho. D'K. het drü Wuche vor mir Termin gha, drum hei mir mit ihne abgmacht, dass mir de während der Geburt zu ihrne Giele tüege luege u si zu üsem. Es isch bald knapp worde, da d'K. zwöi Wuche übertreit het u ig, ei Wuche vor em Termin zum Kaiserschnitt ufbotte bi gsy. Mir hei am Tag vor Geburt Du grad am T. d'Türklinke i d'Hand drückt...Der P. isch ei Tag älter als der Stephan.
Ir Wohnig näb üs het es jungs Paar gwohnt wo i dere Zyt ghürate het. I ha gwüsst i weler Kirche, ha mit em Pfarrer Kontakt ufgnoh u bi se go überrasche i däm ig uf der Empore gsunge ha. Si hei gar nid gwüsst, dass ig singe u hei mi z'erscht gar nid kennt. Si hei Fröid gha!
Wo der Stephan paar Wuchen alt isch gsy, han ig ihn am ne Namittag uf üsem Sitzplatz gstillt. A däm Abe han ig en Ysatz gha im Kursaal in Bern mit em Tom als Pianist, e Vortrag musikalisch z'umrahme. Der David denn zwöi jährig, het zu dere Zyt stundelang chönne allei im Sankaste spiele. Plötzlech han ig ihn nümme gseh. Vor em Mehrfamiliehuus isch es Fuesswägli gsy, es Gebüsch u derhinger, d'Chiese. I bi du vor's Huus go luege, öb er öppe dort am Traktörli fahren isch. Immer no ke David. I ha du afa rüefe u ha ganz fyyn Antwort übercho. Das isch vom Wasser här cho...I ha der Stephan is Gras gleit u bi zur Chiese gklätteret. Der David isch mit beidne Bei scho im Wasser gsy u het sech no am Rand, a de Grashälm feschtgha. Er het es Förmli us em Sandkaste wölle ir Chiese usspüehle... I ha ne, Gottlob no grad chönne packe. I ha also denn am Abe no zitteret! Vater im Himmu, Danke hesch Dyni Ängle um ihn gstellt gha!