Im louf vom Samstignami sy mir zrüggcho. Es isch wieder Mau megafein gsy, im Alpenblick. Mir hei usgrueht u sy gäge Abe mit em Copen go usfahre Da's no nid grägnet het wie's der Wätterbricht voruusgseit hätti. Plötzlech het der Kurt d'Idee gha, mir chönnte no zu S. Si hei üs grad zu ihrem Bsuech zueche , zum Znacht yglade. Es isch e wunderschönen Abe gsy!
Nach mängem Monet, bin ig Gester wieder Mau i Gottesdienst. Es isch schön gsy u s'het guet tah, myni Gschwüschterti ume eis z'gseh. M@i u Sarah hei e ganz e schöne Lobprys gmacht wo d'Lüt mitgnoh het. Der Luc het e nöii Serie über üsi Werte als Gmeind gstartet. Da cha me's nacheluege:
BewegungPlus Konolfingen (bewegungplus-konolfingen.ch)
Mir hei d'Grandmaman scho vor em Gottesdienst gholt u sy aaschliessend mit ihre u mit mym ältere Brüetsch zu S. Dört hei mir fein ggässe u viel vo früecher, vo jetz u vo däm wo chunnt gredt. Es isch sehr spannend gsy. Der P. het üs no es kurzes Klavierkonzert ggäh u vo syne wunderschöne Bilder zeigt. Mir sy erscht am Abe ume Hei. Di Junge sy ir Cantina gsy u der Kurt isch kurz abe go nes Bier trinke. I ha nümm möge.
Hüt am Morge hei mir am siebni Zmorge ggässe u sy nächär ume go liege. S'Telefon het mi am viertu vor zähni gweckt...Vor em Zmittag han ig di nöischti Folg vo "the chosen" gluegt. Mir hei feini Spargle us Tägertschi mit ere sälber gmachte Bärlouch Mayonnaise ggässe. D'Flavia het feini Dampfnudle gmacht, de hei mir der Räschte Spargle u Mayo ypackt u sy zu ihne go wyter ässe. Mmmh, isch das fein gsy! Hinecht chöme zwöi vo myne "Gurus". I freue mi, se ume eis z'gseh!