Wo der David isch uf d'Wält cho hei mir ja in Grosshöchstetten gwohnt. Es isch üs i däm Huus würklech nid so wohl gsy. Der David isch hüfig verkältet gsy u mir sy albe im Winter paar Mal mit ihm bym Dokter gsy. Är het dört o nid guet gschlafe. Mir hei e Familie in Münsinge glert kenne wo nes grosse Huus het gha u sy wuchene lang bi ihne gsy. I dere Zyt han ig en Identitätskrise gha. I bi plötzlech es Mami gsy u nüm di Nachtühle vo vorhär wo albe mit em Schatz Hei isch go Znacht ässe u aschliessend mit de "Gurus" no z'Tanz isch bis i de früeche Morgestunde für nächär go z'schaffe.
In Burgdorf het's zu dere Zyt e Jugend Evangelisationskonferänz gha: Input 1991. Es isch grad für mi gsy. I ha dörfe dört häre gah. Es Wuchenändi lang het's di verschiendenste Workshops gäh zum Thema: wie chan ig my Gloube wytergäh. Ig ha mi derfür im Chor gmäldet. Mir sy us de verschiedenste Kirchene gsy us em Ämmital. Mir sy zäme is Safiental go üebe. I weiss no, dört im Safiental hei mir i re urchige Alphütte gwohnt mit alte höche Bett. G'üebt hei mir im ne chlyne Dorf Chiuchli. Es het e Band mit Piano, Bass u Schlagzüg gha u d'Lüt sy cho luege, was da für ne Lärm ir Chiuche sygi...Nach dere Wuche sy mir uf Tournee a verschiedenen Orte ir dütsche Schwyz. Es het gfägt! I dene zwöi Wuche han ig e nöii Begägnig gha mit Gott u ha gwüsst, dass es guet isch mi für d'Familie entschiede z'ha. I ha nämlech im Safiental gmerkt, dass ig ume schwanger bi.
Mir hei i dere Zyt en anderi Wohnig gsuecht u hei gly druf abe uf Zäziwil a Mooswäg züglet.