Ja, der Noé isch rächt krank gsy. Er het Picornavire, Parainfluenza u ne Mittelohrentzündig gha. Mit anderne Wort: er het d'Grippe gha. Die git's also doch no... Merci für alli Gebät. Er het syt Gester ke Surstoff meh u si wärde ihm, sobald är besser trinkt, d'Magesonde usenäh. Wenn alles guet geit, de chan er Morn Hei. Das wünschen ig ar ganze Familie vo Härze.
Myni Cousine isch gester Nami ume Hei gange. Es isch schön gsy, se hie z'ha.
Der Kurt isch Gester uf em Heiwäg no is Portugiesische Beizli eis go zieh u is Lädeli go ychoufe. Nach em Znacht hei mir zäme üse Nonnefilm gluegt. I ha am Namittag no mys Dorf aagluegt: Mini Schwiiz, dini Schwiiz - Berner Mittelland – Tag 1 – Biglen - Play SRF
Hüt am Morge bin ig ume mit Livenet ir Pouse gsy. Der Leiter vom Go-Movement vom Afrikanische Kontinänt het üs ermuetige meh vo üsem Gloube z'verzelle. Ja, i weiss nid was i miech ohni mi Gloube. Das han ig hüt Morge aschliessend mit der S. diskutiert. I bi sicher, i wär nüm da. I gsäch ke Sinn wyter z'läbe...i bi so froh han ig e Perspektive. I gloube a nes Läbe nach em Tod u das laht mi locker i d'Zuekunft blicke. I weiss, dass öb ig läbe oder stirbe, Jesus geng bi mir isch u wirds blybe.
I ha is Büro müessen aalütte, da's mir schlächt isch worde. Der M@i isch cho choche u der David isch uf em Wäg i d'Insel spontan cho u het derfür der Tisch deckt. Es het feins Currypoulet mit rys ggäh u Salat. Es isch fasch knapp bemässe gsy...mir sy haut siebni gsy am Tisch...u s'isch haut so fein gsy...