Sorry, das isch no vor Davids Geburt passiert...i bi denn schwanger gsy...'ha viel müesse erbräche...drum so dünn uf em Bild...
Der Kurt u ig sy id Ferie, uf Sardinie is Refugio in Orosei. Fründe vo üs hei dört e Pension eröffnet mit schöne Zimmer. E Fründin vo mir, kurz nach ihrer Hochzyt u di jüngschti Schwöschter vom Kurt sy mitcho. Im Refugio het's no anderi Gäst gha. Eines Tages isch e Sard u no es Päärli us der Schwyz mit üs a ne wunderschöne Strand. Der Sard isch i Sand gläge u gly Mau yygschlafe. Mir sy z'sächstehöch is Meer go bade. Nach ere gwüsse Zyt han ig gmerkt, dass en Urueh ir Gruppe gwachsen isch wo gly bir Frou vom Päärli, i ne Panik usg'artet isch. Es het nämlech plötzlech e starchi Ströhmig ggäh, wo eim immer meh is Meer usetrybe het u o gäge ne Felse Gruppe. Es het eim d'Füess hingerezog, e so dass me nümm het chönne stah u no weniger loufe. Da ig als Kind gwöhnt bi gsy im Meer z'schwümme bin ig sofort ygschritte. I ha di Frou kläpft u se aagmöögget, si söll still sy, ha se vo Hinder packt u bi mit ihre, Dank de Wälle a Strand gschwumme. Als zwöite han ig ihrem Partner ghulfe o mit de Wälle zu ihre a Strand z'glange. I bi aube unger Wasser zrügg zur nächste Person. Das isch myni Fründin gsy. Myni Schwägerin isch fasch so ruhig blybe wi der Kurt, drumm han ig si aus nächsti gholt. Es isch für mi en Überwindig gsy, my Schatz als Letschte go z'hole. I bi nämlech total erschöpft gsy. Wo alli dusse sy gsy, bin ig a Strand gläge u ha nume no grännet. Es isch d'Erliechterig gsy, alli dusse z'ha. Da isch üs bewusst worde wiso, dass ja niemer süsch a däm Strand isch gsy. Üse Kolleg het so guet gschlafe, dass er nüt dervo gmerkt het.