Won ig hüt is Badzimmer bi, het mi d'Sunne e so bländet u d'Brülle han ig o nid anne gha. Da han i der Kurt gweckt i däm ig grüeft ha:"i re Stund sy si scho da, Thür's Buebe!" Won är du is Bad isch, het är mir zrügg grüeft:"es isch aber ersch Siebni!" I ha voll gmeint, es sygi Achti...Sorry, my Schatz!
Mir hei du afängs es Kaffi gnoh. Am Nüni hei mir de mit de Buebe Sarah's feini Züpfe ggässe. Si hei all drüü no ganz härzig d'inne gspielt u nächär sy mir use. D'usse hei mir gfüüret. Di zwe Grosse sy mit de Velos umegfahre u ig bi mit em Even füre gloffe. Vor der Fabrik hei mir uf d'Froue gwartet. Si sy gsy go shoppe, für d'Deko vom Hochzyt. Ihri Manne sy syt Gester mit em M@i am Poutere.
Zum Zmittag het der Poppeli Würst, Pouletbrüstli u Spareribs brätlet. Derzue het's Salat, Chips u Sabrina's Lasagne ggäh. D'Flavia u d'Sarah hei zum Dessert en ächte american Applepie gmacht u derzue Vanilliesauce. Mmh, isch das fein gsy. Si sy du Hei go Mittagschläfle, ömu der Even. Dä isch so müed gsy.
Am Vieri sy d'Pouterer derhärcho. Der Kurt het ihne s'Bedli gheizt gha u scho ume gfüüret. Si hei brätlet, ggässe, badet(s'Wasser isch fasch 40 Grad) u sy jetz no ir Fabrik am Musigg mache u am fyyre.