Wo der David isch füf Mönet alt gsy bin ig, Barfuess uf em Parkett mit Blüetestoub usgrütscht. I bi am Stille gsy, uf em Balkon u der David het grad däwä d'Windle gfüllt, dass ig mit ihm yne gumpet by. I bi gstoglet u wüu ig ihn gschützt ha, bin ig blöd gheit. I bi du bis zum Telefon gschnaagget u ha der Nachbere aaglütte. Mir hei du der Kurt lah cho u sy zum Dokter. Dä het gseit, es sygi äuä d'Bänder vom Chnöi aagrisse. Är mäldi mi grad im Spital Grosshöchstetten für ne Spiegelig aa. I ha im Spital gseit, i wölli wyter stille u wölli wäge däm e Voll Narkose. I wärdi d'Milch 24 Stund, all 4 Stund abpumpe u furtgheie. Wenn's en Operation bruuchi, de wöll ig id Permanence, uf Bärn. Der Kurt isch während myre Spiegelig mit em David i üsem Spitalzimmer gsy. Es wär dene Dökter nid i Sinn cho ihn z'frage, öb's okay isch...Es het verdächtigi Bluetspuure gha u de hei si mir s'Chnöi eifach uftah. Si hei du gseh, dass der Huusarzt rächt het gha, dass d'Bänder aagrisse sy gsy. Si hei s'Chnöi greiniget u wieder zue tah. Won ig erwachet bi u mys Bei nid eifach drü Löchli, sondern e Chässchyne drum het gha, han ig fasch e Schreikrampf gha! Si hei mir e ryyse Schlytz dryy gmacht. I ha du zwöi Wuche müesse dört blybe. Da ig halbprivat versicheret bi gsy, han ig uf der Wöchnerinnen Abteilig es Einzuzimmer gha. Der David isch s'Schätzeli vo de Säuglingschwöschtere gsy, da är scho het chönne guggele...Si hei mir ne aube gwicklet u hei ne ir Nacht is Bebezimmer gnoh, dass ig cha schlafe. I ha nächär Daheime d'Spitex bruucht. Üsi Nachbere vo obe hei o rächt ghulfe. Won ig es halb Jahr später i d'Kontrolle bi, het mir der Chirurg der Vorschlag gmacht, i chönni im Winter no Mal cho u de tüeg är de di unschöni Narbe korrigiere. Er müessi de nume chly Gwäb yschicke u de wärdi's de vor Krankekasse zahlt. I ha vorhär mit myre Schwägerin gredt wo bi ihm s'Chirurgie Praktikum gmacht het gha. I ha bi ihre gmeint gha, es heigi äuä der Assistänt gnäit, dass es so wüescht sygi. Da het si gmeint, dä hät sech meh Müeh ggäh. Das heigi der Chef sälber gmacht, i syg doch Halbprivat versicheret...I ha du däm Arzt g'antwortet: "i wärdi sicher nid myni Krankekasse bschysse wäge ihm. Ig müess mi nid schäme für di Narbe. Da fragi mi d'Lüt ender, was hesch o Du für ne Chirurg gha?"