Während der Schwangerschaft han ig jede Tag erbroche u bi nachhär 16 Kg liechter gsy als am Afang...
Im louf vom Namittag vom Terminttag han ig Wehe übercho. Der Kurt isch mit mir is BeauSite uf Bärn. Dört het myni Frouenärztin ihri Patientinne gha. Mir sy gäge 19Uhr dört gsy. Si hei z'ersch kes Zimmer frei gha u im Bebezimmer hets 25 Chlyni gha. Si hei mir Mittu ggäh wo d'Wehe tüe aktiviere. Am 23.30Uhr han ig regumässigi Wehe gha u doch het's irgendwie nid vorwärts wölle gah. D'Hebamme het mir wölle Valium gäh, dass ig mi no chönnti mit schlafe erhole. Zum Glück het's e Schichtwächsu ggä. I ha dere Hebamme gseit, es syg mir nid wohl, i heigi e komisches Gfüehl wenn ig a Schlaf sött dänke. Si het mir du der Kontraktionsmässegurt aagleit u d'Härztön vom Baby glost. Da het si gmeint, es töni wi we das Baby Stress hät. Vo denn aa isch alles schnäll gange. I bi i Operations Saal cho u bi i ne Vollnarkose gsteckt worde. Si hei mir per Kaiserschnitt der David usegno. I ha vor Narkose här so fescht müesse erbräche, dass ig my Bueb ersch nach Stunde wahrgnoh ha.I bi Gott so dankbar, dass mir ir Schwyz läbe, wo me i settigne Fäll rächtzyttig cha handle. Der Vivian Sturm isch am wüete gsy u myni Schwiegermamma het vo Glarus här wölle mit em Zug uf Bärn cho. In Kilchberg isch nüt meh ggange. Si het müesse zrüggfahre. Si isch du es paar Täg später cho.
Der David isch mit 47cm so chly gsy, dass ihm d'Grössi 50 no z'gross isch gsy. D'Hebamme het syni Füess aagluegt u gmeint, das gäb de e grosse Maa. Hüt isch er 1.90 m u het o scho zwöi härzigi Kinder. Vier Täg nach der Geburt, i ha s'Zimmer näb em Säuglingszimmer gha, han ig glütte si sölle mit de David bringe är gränni. Die Säuglingsschwöschter wo cho isch het glachet u gmeint, es syge 25 Bebes i däm Rum. I chönni sicher nid mys Bebe us all dene drus use ghöre. I ha mi du ufgrafft, trotz Schlitz im Buuch ufz'stah u bi ihre go zeige: "das Bebe da wo grännet, das isch der David!" Er isch du nächär düre Tag meistens bi mir im Zimmer gsy.