Es isch e alti Wohnig gsy, mit em ne Balkon mit wunderschöner Ussicht über s'Ämmital u de Alpe, vor allem am Niese. Ir Chuchi het's e Wandschrank gha mit Löcher gäg use. Das sygi der Kühlschrank. Es het no e richtige quadratische Schüttstei gha wi früecher. Nach em Abwäsche het me Rüggeweh gha, so töif isch dä gsy...Der Kochherd isch so alt gsy, dass mir ihn gly i Keller gstellt u sälber eine zuechetah hei wo mir üse eiget Kühlschrank bstellt hei.
Mit der Nachbarin vom zwöite Stock u ihrem Hund, bin ig während der Schwangerschaft, fasch jede Tag go spaziere. Si u ihre Maa sy ganz liebi gsy. Mir sy viu zäme ghöcklet. Si hätte vom Alter här üsi Eltere chönne sy.
Es het ums Huus um e grosse Garte gha. D'Husmeischtere isch vom Früehlig aa jede Tag dusse gsy. Si het im Summer, mit über Achzgi no im Bikini gjättet. Si het e blaue Balkon gha. I ha verno, wieso. Si heigi immer a's Meer wölle u ihre Maa heigi ihre Balkon blau gstriche u ihre gseit, das sygi s'Meer...
Üse Parkplatz isch z'chly gsy für üse Opel Ambassador wo mir denn gha hei u der Kurt isch immer wieder süferli i Gartepfoste gfahre bis er einisch i Garten yne umgheit isch u der Parkplatz derdür grösser worden isch. Är het, vor üsne Ferie dä Betonpfoste du mitgnoh u het ne in Zäziwil hinger d'Fabrik gschosse. Wo mir vo de Ferie sy zrügg cho, isch üsi Husmeistere cho lütte u het droht zur Polizei z'gah. Mir heige ihre Gartepfoste gstolle. Der Kurt het ihre du g'antwortet är bringi ihre dä Pfoste sofort zrügg, dä sygi ja hie nume im Wäg gsy...u übrigens chönni ja är o zur Polizei gah. Si heigi i ihrem Garte plötzlech vo üsne Gartesezlige, wi das chömm? Die syge im Gartewägli gwachse. Si heigi nume gjättet... Der Kurt isch sich vo Daheime gwöhnt gsy mit Mischkulture z'gartne u das het ihre gar nid passt...
Üse David isch i dere Zyt uf d'Wält cho. Da hei mir bi ihre doch viu Pünkt übercho. Si het üs gratuliert, dass mir us Erschts grad e Stammhalter härebracht heige...