I ha ja im 1987 myni Lehr zur Krankepflegerin FASRK im Altenberg aagfange. I bi vor allem im Altenberg für myni Praktika yteilt gsy, ha im Salem chönne mys Spitalpraktikum mache u bi für's Füehrigspraktikum uf Ittigen is Asyl Gottesgnad cho. I ha bis denn immer gueti Qualifikatione u i der Schuel ganz gueti Note gha. D'Abteiligsleiterin vo dere Station won ig yteilt bi gsy het mi mit dene Wort begrüesst: "I heisse.....Gäu Du hesch z'Münsige als Psychischwoscht d'Lehr abbroche!" Es sy i de füf folgende Wuche ganz viu schrägi Sache gloffe wo schwär z'erkläre sy. Uf all Fäll het mir die Abteiligsleiterin drü Wuche vor der Prüefig erklärt, dass ig vo ihr uus nid ad'Prüefig chönn. Am nächste Morge bin ig uf em Wäg nach Ittige a ren Ample, mit mym Outo am Vordere is Füdle gfahre. Das het glängt, dass ig mi uf d'Abteilig bi go abmälde u der Leiterin gseit ha, si söll am Schuelleiter myni Quali schicke. Dört drinne isch gstande, i chönni weder rede no organisiere u scho gar nid leite. We me das gläse het u mi kennt, het me dänkt das sygi sicher öpper anders gmeint...
Am Namittag isch my Maa o uf Bärn cho. I ha es Gspräch mit em Schuelleiter gha u är het mir drü Optione vorgstellt: 1. chönn ig d'Lehr abbräche, was är mir nid würd empfähle 2. söll ig di letschti Phase wiederhole, das wäre Acht Mönet. Das het är mir gratet u 3. chönn ig Rekurs mache aber da heig ig e schwäre Stand gäge ne Abteiligsleiterin. My Maa u ig hei beidi chönne ei Wuche Ferie näh u sy uf Glarus. Dört hei mir ei Abe bym ne befründete Leiter vo re Droge Reha verbracht. Mir hei zäme di ganzi Gschicht im Gebät vor Gott bracht u üse Fründ het mi derzue ermuetiget e Rekurs z'mache. I ha ne Rekurs gmacht, dass ig nid yverstande sygi, dass s'Füehrigspraktikum über alli andere Praktika gstellt wärdi u entscheidend sygi, öb me a d'Prüefig chönn oder nid.
Nach dere Feriewuche bin ig wieder im Altenberg uf ere Abteilig yteilt worde wo vo re Diakonissin gleitet isch gsy. Si het mi mit dene Wort begrüesst: " i heisse....u ha d'Quali vo Ittige nid gläse. I wott Di kennelerne wi Du bisch. Wei mir zum Afaa zäme bätte?"
Vier Wuche später isch myni klass diplomiert worde. I bi spät yne u früeh use...es isch meh e Truurfyyr gsy. I ha di ganzi Fyyr organisiert gha u niemer het gwüsst wieso ig nid derby bi. Es het eifach gheisse, i heigi nid a d'Prüefig chönne.
E Wuche später han ig a nes Gspräch zum Schuelkommissionspresidänt dörfe. I ha üse Troupfarrer mitgnoh. Bi däm Gspräch hei si mir wölle wysmache, dass s'hürate während der Lehr, mi überforderet heigi. I ha druf g'antwortet si tüege s'Konkubinat fördere. Wie mängi vo myne Mitschüelerinne göng am Abe zum Fründ u tüeg ihm d'Pantoffle a Fernseesässel bringe. Üse Troupfarrer het no bygfüegt, dass är my Maa kenni u är wüssi, dass ig am Abe a ne deckte Tisch chönni wüu der Kurt kochet heigi...öb das überfordernd sygi?
My Rekurs isch gly dürecho u ig ha nume acht Wuche Füehrigspraktikum müesse mache u die Wuchene won ig scho im Altenberg bi gsy sy aagrächnet worde. Es sy füf ExpertInne vom SRK mi allei cho prüefe. I ha mit überem ne füfi abgschlosse. A myre Diplomfyyr sy my Maa u der Schuelleiter yglade gsy u d'Schwöschter Vreni het e ganzi Klass für üs lah singe.