I ha im Sinn gha, nach der Usbildig no paar Mönet voll z'schaffe u nächär uf Teilzyt z'reduziere. Am Tag vo myre Diplomfyyr han ig e Termin gha byr Frouenärztin. Si het mi gfragt gha, wenn dass ig z'letscht Mau d'Mens heigi gha...I ha du gmeint, dass ig wäg der Prüefig u allem Stress paar Wuche drüber sygi. I verzelle de Morn vor Prüefig...Si het der Schwangerschaftstest gmacht. Uf all Fäll het mi der Kurt denn mit Champagner gweckt u i ha se gfragt öbs nüt machi. Si het du gmeint, ig chönni grad wieder go aastosse, i sygi schwanger!
I ha myni Stell im Spital Grosshöchstetten e paar Tag später aaträtte. D'Abteiligsleiterin isch e verbitteretti, alti Jumpfere gsy wo sech ufgregt het, dass ig nüm voll wöll schaffe. I ha jede Tag erbroche u si het derzue bytreit indäm si mir di schwierigschte Fäll gäh het, settigi mit künstlechem Darmusgang usw. I ha du nach drü Wuche, no i der Probezyt der Bättel häregheit...