Wo mir ghüratet hei, het der Kurt in Tavannes gschaffet u ig im Altenberg in Bärn. Üsi erschti Wohnig isch e drü Zimmer Wohnig im ne Block gsy, in Lyss. I ha dört sehr Müeh gha mit em Näbu. Am Wuchenändi sy mir drum meistens uf Thun zu mynen Eltere. I ha dört geng no mys schöne Zimmer gha mit Blick uf di deckti Holzbrügg hingerem Hotel Freienhof und uf's Stockhorn. Wenn ig gschaffet ha u är nid, isch der Kurt bi mynen Eltere gsy oder er isch i mys Zimmer cho, uf Bärn. Nach em ne haube Jahr isch är im Gschäft vo sym Vater ygstiege, ir Möbelfabrik Bläuer Zäziwil u Oberdiessbach. Es haubs Jahr lang isch är mit sym Unkel gfahre wo z'Lyss wohnt. I bi de meistens mit em Outo go schaffe. I ha's aube gnosse, am Abe zum ne deckte Tisch chönne z'sitze. Är het meistens vor mir Fyrabe gha u het de kochet gha. Mir hei gwüsst, dass mir nid lang wärde dört wohne.
Afangs 1989, sy mir uf Grosshöchstetten züglet. Dört sy mir i re drü Zimmer Wohnig, im ne drü Familie Huus gsy. Es isch es alts Huus gsy u s'Kinderzimmer isch mega füecht gsy. Der Kurt het MDF-Platte a d'Wand gnaglet gha u se gstriche u wo mir nach 1,5 Jahr use sy, isch si düregrauet gsy...Üses Bett isch o total vergrauet gsy. Im Winter, hei mir müesse im Käller Kohle schufle. Meistens hei mir denn aube am Morge im Schlafzimmer öppe 14 Grad gha...Das Huus het a re Frou ghört wo verschiedeni Näme het gha, allisamt nid grad rüemlechi. Mir hei probiert mit ihre us z'cho. Das isch es schwierigs Unterfange gsy. Si isch schwärhörig gsy. Wenn si im Parterre ihre Radio aaglah het, de hei mir's im erste Stock nid verstande, es het sech überschlage. Me het's erscht im zwöite Stock verstande...Ihri erste Nachrichte vom Tag wo si glost het sy die vom Morge am Siebni gsy. O am Sunndig. Si het Am Mittag u am Abe o no Nachrichte glost...